ಸ್ವಾತಿ ಮಳೆಹನಿಯಾಗಿ ಕಪ್ಪೆ ಚಿಪ್ಪನು ಸೇರಿ
ಮುತ್ತಾಗೊ ಆಸೆ ಇತ್ತು
ತಾವರೆ ಎಲೆಯಲ್ಲಿ ಹೊಳೆವ ಹನಿಯಾಗಿ ರವಿಯ 
ಬಿಂಬಿಸುವ ಆಸೆ ಇತ್ತು
ನೀರು ಹುಲ್ಲಿನ ಕೊನೆಯನ್ನು ಸೇರಿ
ತಂಪಾಗೋ ಆಸೆ ಇತ್ತು

ಸಾಧನೆಯ ಗೈದ ಮುಗ್ಧ ಕಣ್ಣ್ಣುಗಳಲ್ಲಿ
ಭಾಷ್ಪವಾಗುವ ಆಸೆ ಇತ್ತು
ಆಟವಾಡುತಲಿರುವ ಮುದ್ದು ಕಂದಮ್ಮಗಳ
ಜೋಲ್ಲಾಗೋ ಆಸೆ ಇತ್ತು
ಹರಿವ ನೀರನು ಸೇರಿ ಹರಿ ಪಾದ ತೊಳೆದು
ತೀರ್ಥವಾಗುವ ಆಸೆ ಇತ್ತು

ನನ್ನೊಳಗೆ ಸೇರಿ ನನ್ನನೇ ನಾನರಿತು ನಾನೇ
ನಾನಾಗೋ ಆಸೆ ಇತ್ತು
ನಿನ್ನೊಳಗೆ ಸೇರಿ ನಿನ್ನ ಭಾವವನರಿತು
ನೀನಾಗೋ ಆಸೆ ಇತ್ತು

ಆಗಿಹೆನು ನಾನು ಆಸೆಯೆಲ್ಲವ ಬಿಟ್ಟು
ಭೋರ್ಗರೆದ ಮಳೆಯ ನೀರಾಗಿ
ಕಡಲನ್ನು ಸೇರಿ ಬೀಸು ಗಾಳಿಗೆ ಸಿಲುಕಿ
ಅಪ್ಪಳಿಸುತಲಿರುವ ತೆರೆಯಾಗಿ

ಬಣ್ಣದ ಬೆಳಕಲಿ ಅಡಿದೊಡೇನು
ಬಣ್ಣದ ವೇಷವ ಹಾಕಿದೊಡೇನು
ಬಣ್ಣದ ಮಾತುಗಳಾಡಿದೊಡೇನು
ಬಣ್ಣದ ನೀರನು ಕುಡಿದೊಡೆ ಏನು

ರವಿ ಚಂದ್ರರಿಗೆ ಇಹುದೇ ಬಣ್ಣ
ನದಿ ಸಾಗರ ಹಿಡಿದಿಟ್ಟಿಹುದೆ ಬಣ್ಣ
ಮೋಡದ ಹಿಂದಡಗಿಹುದೆ ಬಣ್ಣ
ಆಕಾಶದಲಿ ತುಂಬಿಹುದೇ ಬಣ್ಣ

ಆಡಬೇಕೇನು ಬಣ್ಣದ ಮಾತು
ತೋರಬೇಕೇನು ಬಣ್ಣದ ರೂಪ
ಬಿಂಬಿಸಬೇಕೇ ಭಾವದಿ ಬಣ್ಣ
ಪಡೆಯಲು ಬೇಕೇ ಬದುಕಿಗೆ ಬಣ್ಣ

ಬದುಕಿನಂಗಡಿಯನ್ನು ತೆರೆದೆನಂದೊಂದು ದಿನ
ವ್ಯಾಪಾರ ನಿಯಮಗಳ ಅರಿವಿಲ್ಲದೆ

ಇಹುದೇನು ಸರಕುಗಳು ಬಾಳಿನಂಗಡಿಯಲ್ಲಿq
ಸುತ್ತಲಿನ ಗ್ರಾಹಕರ ಇಚ್ಛೆಗನುಸಾರ

ಒಬ್ಬೊಬ್ಬರಿಗೊಂದೊಂದು ಸರಕುಗಳ ಸೇರಿಸಿದೆ
ಬದುಕಿನುಗ್ರಾಣವದು ತುಂಬುತ್ತಲಿತ್ತು

ಇರುವರದೆಷ್ಟು ದಿನ ಗ್ರಾಹಕರು ನಿನ್ನ ಜೊತೆ
ಅವರ ಆಶಯವದು ನಿನಗೆ ಅರ್ಥ ವಾಗದಿರೆ

ಗ್ರಾಹಕರು ಅವರಿಷ್ಟ ಬಂದ ಕಡೆ ಸಾಗುವರು
ನಿನ್ನಂಗಡಿಯ ಸರಕವರಿಗಿಷ್ಟವಿಲ್ಲದಿರೆ

ಬದುಕೊಂದು ನಿನಗರ್ಥ ಆಗದಿಹ ವ್ಯಾಪಾರ
ದೇಹವೆಂಬೀ ಅಂಗಡಿಯೇ ಸರಕಿನುಗ್ರಾಣ
ಮನಸು ಬುದ್ಧಿಯ ಜೊತೆಗೆ ಮಾತು ನಡತೆಯೇ ಸರಕು
ಅಂಗಡಿಯ ಮಾಲಿಕನು ನಿನ್ನಾತ್ಮ ತಾನೇ

ದಿನವೊಂದು ಬಹುದಿಲ್ಲಿ ಅಂಗಡಿಯನೇ
ಕೊಳ್ಳೋ ಗ್ರಾಹಕನವನು
ಲೆಕ್ಕ ಹಾಕುವನೇನು ನಿನ್ನುಗ್ರಾಣದ ಸರಕನ್ನು
ಗ್ರಾಹಕರೇ ಇಲ್ಲದಿಹ ಬದುಕಿನಂಗಡಿಗೆ

ಕಲ್ಲಲ್ಲಿ ಕಾಣಿಸಿತು ಮೂರ್ತಿಯದು ಶಿಲ್ಪಿಗೆ
ಉಳಿಯ ಏಟನ್ನು ತಿಂದ ನೋವೆಲ್ಲ ಶಿಲೆಗೆ

ಮರದಲ್ಲಿ ಕಾಣಿಸಿತೇ ರಥವು ಆ ಬಡಗಿಗೆ
ಬೇರುಗಳ ಕಳಕೊಂಡ ನೋವೆಲ್ಲಾ ಮರಕೆ

ಸೊನ್ನೆಗಾರನಿಗೇನು ಕಾಣಿಸಿತು ಚಿನ್ನದಲಿ
ಹೊಡೆದನೇತಕೆ ಅದಕೆ ಅಗ್ನಿ ತಾಪದ ಜೊತೆಗೆ

ಮೂರ್ತಿಯಲಿ ಕಲ್ಲಿಲ್ಲ, ರಥದಲ್ಲಿ ಮರವಿಲ್ಲ
ಆಭರದಲಿ ಮಾತ್ರ ತುಂಬಿಹುದು ಚಿನ್ನ

ನೋವುಂಡ ಚಿನ್ನವದು ಕಳೆದಿಲ್ಲ ನೈಜತೆಯ
ಕೊಡಬಹುದು ಆನಂದ ಬಹು ರೂಪಿಯಾಗಿ
ಪಡೆವುದಾಕರ್ಷಣೆಯ ಚಿನ್ನದಾಭರಣವದು
ಮನ್ನಣೆಯ ಪಡೆಯುವುದು ಈ ಜಗದ ತುಂಬಾ

ಆಗದಿರು ನೀ ಶಿಲೆಯು, ಮೂರ್ತಿಯಾಗುವೆನೆಂದು
ಬರಿಯ ಮರವಾಗದಿರು
ಫಲವ ಕೊಡಬಹುದೆಂದು
ಇರು ನೀನು ದೇಶ ಕಾಲ ರೂಪದೊಳು
ಮನ್ನಣೆಯ ಪಡೆವ ಬಂಗಾರವಾಗಿ

ಹೋಮ ಕುಂಡದ ತೆರದಿ
ಕಾಲ ಕುಂಡವದೊಂದ
ಕಟ್ಟಿ ಬೆಳೆಸುತಲಿರುವೆ
ಸಂವತ್ಸರಗಳೆಂಬ ಇಟ್ಟಿಗೆಯ ಬಳಸಿ

ಬಾಳ ಯಜ್ಞವನಿಲ್ಲಿ ನಡೆಸುತ್ತಲಿಹೆ ನಾನು
ಕುಳಿತಿರುವ ಅಧ್ವರ್ಯು ಆ ಕಾಲ ದೇವ
ಸಲ್ಲಿಸಿಹೆನಿನ್ನೊಂದು ಆಹುತಿಯ ನಾನಿಂದು
ಕಳೆದು ಹೋಗುತ್ತಿರುವ ಆಯುವಿನ ಜೊತೆಗೆ

ಶೈಶವವು, ಬಾಲ್ಯವೂ ಯೌವನಾವಸ್ಥೆಯೂ
ಸೇರಿಹುದು ಯಜ್ಞಕ್ಕೆ ಆಹುತಿಯದಾಗಿ

ನಡೆಸಿರುವ ಕಾಯಕವು ಆಗಿಹುದು ದ್ರವ್ಯವು
ಬಾಳ ಯಜ್ಞಕ್ಕೆ ಹುತಾಶನನನ್ನು ಸೇರೆ

ಕೆಲವು ದ್ರವ್ಯಗಳಿಲ್ಲಿ ಪ್ರಜ್ವಲಿಸಿ ಉರಿಯುತಿರೆ
ಕೆಲವು ಎಬ್ಬಿಸಿತು ಧೂಮದಾ ಮೋಡ
ಕೆಲವು ಕಾರ್ಯಗಳು ಆಜ್ಯವಾಗಿರಲಿಲ್ಲಿ
ಕೆಲವು ಆಗಿಹವು ಚರು- ಪುರೋಡಾಶಗಳು

ಸಮಿಧೆಯಾಗುರಿಯುತಿಹ
ಇನ್ನು ಕೆಲ ಕಾರ್ಯಗಳು
ಬಂಧು ಬಾಂಧವರಿಂಗೆ
ಸುಖವ ತರಬಹುದೇ?

ಅರ್ಪಿಸಲೇ ಬೇಕು
ಶೇಷ ಭಾಗದ ಹವಿಸು
ಕಾಯುತಿಹ ಈಶ್ವರನ
ತೃಪ್ತಿಗಾಗಿ